الأصحاح الأول من سفر التكوين ... بين العلم و الكتاب المقدس

عارف أن بلدنا الحبيبة مصر بتمر بلحظات حاسمة في تاريخها . لكن بعد ما واجهت عدة اسئلة من كذا واحد من أخوتي حول الأصحاح الأول من سفر التكوين و مدى علاقته بالعلم لقيت اني لازم اكتب عن الموضوع و اسمحولي أكتب بلغة عامية يفهمها الكل .

 الأصحاح الأول في سفر التكوين ملوش دعوة بالمجرات الكونية و لا الشهب و الابخرة السديمية ولا ازاي ربنا خلق العالم و ترتيب خلقة الحيوانات و مينفعش تعد تفسر اشياء شايفها العلم الخاطئة و  تقعد تقولي السبع ايام بيمثلوا سبع حقب جيولوجية و تفسرلي ازاي النور موجود قبل الشمس و النجوم  و ازاي الانسان صورة الله و في الروح ولا في الجسد مفيش الكلام ده ، مش ده هدف الاصحاح خالص مالص . بالعكس ابسوليوتلي .

الأصحاح بيتكلم بلغة طقسية يعني ايه ؟

يعني بيصور ربنا و كأنه بناء بيبني معبد او هيكل له ليسكن فيه اللي هو (السموات و الارض)

و بعدين بيبتدي يوصف ازاي ربنا بيبني المعبد أو الهيكل ده :

أول حاجة ان ربنا بينتصر على أعداء الإنسان (الظلام و الفوضى و المياه العميقة الغريقة) و كله ده بفعل روح الله اللي هي روح الحياة (الروح القدس). عشان كده متقلش ان الله خلق المياه. 

2- تقولي النور اتخلق ازاي قبل ما يكون فيه شمس ؟ ارد و اقولك الموضوع مش معضلة علمية ولا حاجة ... حضرتك لو قمت بدري شوية الصبح قبل ما تطلع الشمس حتلاقي في نور موجود و مفيش لا شمس ولا نجوم عادي يعني من غير لا سحر ولا شعوذة و نفس الموضوع بيحصل بليل الشمس بتغيب و يفضل في نور طبيعي دي مش معضلة يعني خصوصا للقاريء اليهودي العادي.

3- ربنا بيجي على المياه و يقوم قاسمها نصين واحد فوق وواحد تحت و بيحجز النص اللي فوق عن النص اللي تحت بانه بيحط سقف قوي مسطح كبير اسمه (السماء) عشان يحجز المياه فوق متنزلش تحت و عشان كده تلاقي ان في قصة الطوفان السفر بيقول ان الله فتح كوى السماء يعني عمل في السقف فتحة تنزل منها الماية

و بعدين ربنا بيعمل يابسة فوق الماية اللي تحت عشان تبقى شبه السقف القوي اللي بيحجز الماية اللي فوق.

4- و بعدين ربنا قال للارض تطلع نباتات مختلفة اللي هي بعد كده حتبقى غذاء سكان الارض من حيوانات و بهائم و بشر.

5- ربنا بعد كده في اليوم الرابع بيركب لمبات و نجف في السقف الصلب اللي هو السماء زي ما أي واحد بيحط منارات أو لمبات و نجف في سقف المعبد ، و النجف و اللمبات دي اسمها شمس و قمر و نجوم  وهي اللي حتبدي الناس تستخدمها عشان يحسبوا الوقت.

6- و بعدين ربنا بيحط سكان لمجتمع المياه اللي تحت اللي هما الاسماك و البرمائيات و بيحط سكان للمياه اللي فوق  اللي هما الطيور

      
7- و اخيرا ربنا خلق سكان الارض اللي هما الحيوانات و البشر و زي ما خلى لكل المخلوقات نسل شبهها هو كمان خلق لنفسه حد شبهه اسمه الإنسان و ده في منه ذكر و انثى زي باقي الحيوانات اللي اتخلقت معاه. و الإنسان ده هو حيبقى سيد الكون كله او ظل ربنا في الارض يعني ... الله سيد الكون كله و ابنه الانسان ملك و سيد على الارض كلها (حاجة كده شبه موضوع ان المصريين القدماء كان عندهم إله و بعدين لما يقيموا ملك على مصر يقولوا انه ابن الإله و يخلو الناس تخضع له وممكن يوصلوا لحد عبادته).  

 و الإنسان صورة الله (ظله) و شبهه أو مثاله يعني ببساطة (تأمل الإنسان في تألقه ترى الله في ابداعه) .

8- اخيرا بقى السبع ايام بتاعة الخليقة هي سبع ايام حرفية يعني ربنا خلق الدنيا في اسبوع . تقولي ازاي فهمني يعني ؟

اقولك مش قلنا في الأول ان الله خلق معبد اسمه السموات و الارض ... زمان بقى في الشرق القديم كان سبعة هو الرقم الكلاسيكي المتعارف عليه في بناء المعابد و الهياكل بتاعة الآلهة   يعني مهما المعبد أخد بُناه سنين او شهور لما يجوا يكتبوا عنه يقولوا انه اتبنى في سبع ايام لأن سبعة رقم يرمز للكمال ... يعني افرض معبد اتبنى في شهرين او سنتين لما يكتبوا عنه  يقولوا انه اتبنى في سبع ايام برضه. و لأن الكون هو المعبد اللي بناه الله فاتكتب انه  برضه اتخلق في سبع أيام.

9- لأن الأصحاح بيتكلم بلغة طقسية فهو بيصور ايام الخليقة و كأنها لحن طويل كل ما ربنا يخلص حتة يجي مرد الحتة دي (و رأى الله انه حسن) ... يعني زي مثلا ما ابونا يقول طلبة او اوشية فاحنا نقول كيرياليسون .

أرجو أن تكونوا قد استمتعتم بهذا الفاصل و متدخلوش نفسكم مع اي حد في مشاكل علمية عن الخليقة و ايامها و عصورها لأن الأصحاح الاول مش بيقول حقائق علمية اشرحوه ببساطة زي ما انا شرحت فوق مش حتلاقي فيه مشاكل خالص.

.
اللي عنده اسئلة يتفضل ان تحت الطلب و الأمر